Dans la continiuité des Rois I-IV, on trouve dans la Bible Historiale, conformément à l’usage, une vie d’Alexandre. En voilà la version éditée par les étudiants de la L2 Lettre Modernes (2022) de l’Institut Catholique de Paris:

Du Roy Alexandre le Grand

En celui temps, Pausanie du lignage Hoiestis occist par trahison Phelipe le roy de macedoinen après qui regna Alexandre son fils et comença a regner en l’aage de XX ans. Et puis voult Alexandre conquerre Syze si passa la mer de Helles, et les princes et dux du roi Daire sʼassemblerent contre lui a bataille sur le fleuve Guanicus. Mais Alexandre les veinquit et puis conquit Tyde et Yoonie et sʼen ala en Panphile. Lors assembla Daire, le filz Arsanie, un moult grant ost et passa Eufrates et le mont de Atisse car il cuidoit veincre les macedoniens et leur roy Alexandre aussi. Donc Saraballe ot grant joye car il se pensa quʼil iroit au devant du roy Daire son seigneur quant il revendroint de la victoire des macédoniens et empetieroit a lui lʼedifiement du temple quʼil avoit promis a Manasses son gendre. Et lui Saraballes estoit moult ancien si n’aloit plus en bataille. Mais il avint autrement quʼil ne cuida car Daire fut veincu des macedoniens et de leur roy Alexandre et sa mere fu prise et sa femme et ses enfants. Il sʼenfouy en Perse son royaume a pou de gent et de mesgniee.

Adonc commenca Alexandre a tendre à la seigneurie de tout Orient. Si entra en Tyre et puis Damas et Sydon et assieg(e)a Tyr qui estoit moult forte cité.  

Glose 

Sydon c’est Saiete et Tyr c’est Sur. 

Texte

Lors prist Saraballe .viii m. homes et s’en ala a Alexandre pour lui aydier et lui dist qu’il le serviroit plus voulentiers que Daire et qu’il lui bailleroit et vendroit tout les lieux que Daire lui avoit bailliez a gouverner. Alexandre en fust moult liez. Il le receust a grand honeur et puis lui dist Saraballe : « Siré j’ai un gendre nomé Manassés qui a ma fille épousée, frere du prince du prestre des juifs lequel a en la compagnie moult de juifs. Si leurs servoit voulontiers un temple. Sire, se il vous plaisoit, et sachiez sire qu’il vous rendrait a grant proufit car se les juifs sont devisez en deux parties ils n’oseroit contre vous rebeller ». Alexandre lui octroya. Et Saraballe s’en retourna et puis fist par grant étude un temple et un autel qui demoureroit en estat jusqu’à la destruction que les romains firent. Et fist Manassés evesque au temple qu’il avoit fait. 

Endementres que le roi Alexandre de Grece et des Macedoniens soit devant Tyr, il escripsit au prince des pretres en Jerusalem et lui demanda secours et aide et qu’il lui envoyast viandes avec son ost et lui rendit les trehuz qu’il souloit vendre a Daire. Jaddus respondit qu’il l’avait juré à Daire et qu’il ne les pouvait rendre a autre tant qu’il vequist ains lui  devait garder les establissemens. Donc les menaça moult Alexandre et leur manda qu’il leur aprendrait quel establisment ils devaient garder. Assez tost apres conquist Alexendre Tyr et destruisi toute et abati. Et puis assig(e)a Gazam et  Saraballe mourut. Et quant il ot prit Gaza, il s’en ala vers Jerusalem pour assiger la cité. Lors orent les juifs grant paour. Il crieirent a notre seigneur et firent sacrifices qu’il leur voulsist aider et delivrer la cité sainte. Et Jaddus priait Dieu pour le peuple et sicome Jaddus avait en tout fait le sacrifice a Dieu, et apres il se fut en peu endormi. Notre seigneur Lui dit qu’il fust asseuré et qu’il ornerait la cité de couronnes et de riches ornemants. Et le vestit come evesques de toutes les vesteures qui appertenaient a evesque en sacrifiant; et tous les autres pretres fussent aussi vestu de toutes velteures de pretre. Et ansi ississent a procesion encontre Alexandre; et puis s’esveilla Jaddus et dist au peuple la vision dont ils furent moult esjouyz.

Apres ouyt dire Jaddus que Alixandre estoit pres de la cite. Si s’en ala ainsi come Dieu lui avoit comandé, avec moult de prestres et de bourg(e)ois a grant procession a l’encontre d’Alixandre jusques a un lieu que l’en appelle Saphin, dont on pouoit veoir Jherusalem et le temple. Et quant Alixandre les vit ainsi venir, il descendi de son cheval encontre l’evesque, et s’en ala tout seul a lui et aora le nom nostre [Seigneur] qui estoit escript es vesteures de l’evesque, et honora moult l’evesque. Et les gens qui oncques mais ne l’avoient veu contre nul s’umilier en orent trop grant merveille et cuidierent que la pensee fust esbahie d’aucune chose. Si lui demanda un seul chevalier qui avoit nom Panthemius pourquoi il avoit ce fait, et aoré le prestre des juys. Alixandre lui respondi qu’il n’avoit pas aoré le prestre des juys, mais Dieu de qui il fait le service et de qui vesteures il est vestus. Car une fois dist-il sicomme je gisaie en mon lit en Lice – qui est une cite de Macedoine – et je pensoie en moi meismes se je pourroie toute aise conquerre, je vi Dieu en tel habit comme cil est, qui me dist : « Aies fiance en moi, car je conduirai tes batailles, et te donrai toute la seigneurerie de Perse ». Et ore premièrement ai-je veu la semblance, et la figure en ce prestre. Si ai fiance que ce qu’il me promist m’avendra, et pour ce aorai-je Dieu et ai fait honneur a cest homme.

Apres ce entra Alexandre en Jherusalem et en temple et sacrefia selon ce que le prestre lui aprist. Et puis lui apporterent les juys le livre des prophéties Daniel ouquel estoit escript que un roy de Grece conqueroit le regne de Perse. Si en fut Alexandre moult liez, car il se pensa c’estoit dit de lui. Et lendemain appela Alexandre tout le peuple, et leur dit qu’ilz demandassent quanqu’ilz vouldroient, et a leur demande il leur ottroya qu’ilz peussent par tout oser des lois de leurs peres et le .vii c. an etre sanz trehu, et moult d’autres franchises, et puis s’en ala aux autres citez. Quand les juys de Samarie qui de Saraballe sont ainsi nomez virent la grant largesse Alexandre, ilz vindrent a lui et lui distrent qu’ilz estoient du lignage des juys issuz de la ligniee Effraim et Manasse.

Glose

De ces juifs de Samarie trouverez vous ou quatre livres des roys ou chapitre de la chaitivoison des lignées comment ils disoit qu’ilz estoient prochains aux hébreux quant il leur était bien.

Texte.

Et lui prièrent quil honorast leur temple en Gauzin que Saraballe leur avait fait. Et il leur promit de faire a sa revenue. A donc lui demandèrent ils qu’il leur quita les trehuz du .viic. an. Et il leur demanda qui ils estoient et ils lui distent: « hebreux ». Et il leur demanda se ils estoient juifs et ils distent que nenil.Et lors il leur dist que cette chose avoit il ottroyee aux juifs tant seulement.

Cy fine le mist le maistre es hystoires et trespasse oultre a l’oeuvre Dieu parfaire et parfournir. Le maitre dit es histoires que les arbres du soleil et de la lune estoient arbres auxquels le soleil ferait quand il était levez. Et quand la resplendeur du soleil atouchoit les haultes branches des arbres, les arbres se mouvoient jusques aux racines et respondaient a toutes demandes que on leur faisoit. Et la ot Alexandre response de sa femme et des siens et de sa mort qu’il mourrait en Babilonne. Et les prestres qui là sacrifioient vivaient trois ans sans maladie des pommes des arbres.